ضربة فى قلبك .. واضرب يا نقاوة عيني
تاريخ النشر : 19 دبسمبر 2011
بقلم
دكتور / محمد محفوظ
مقطع أول :
ضربة فى قلبك .. لما رجلك اللى عايزه
كسرها ؛ بالبيادة اللى من فلوسنا ؛ تضرب ولادنا وبناتنا بالشلاليت .
ضربة فى قلبك .. لما إيدك اللى عايزة
حشها ؛ تعرى بناتنا وستاتنا وأمهاتنا ؛ وتسحلهم من شعرهم وهدومهم فى الشوارع
والميادين .
ضربة فى قلبك .. لما لسانك اللى عايز
قطعه من لغلوغه ؛ يشتم زهرة شبابنا ويلعن أشرف ولادنا ؛ ويشخط وينطر فى مؤتمر صحفى
فى الإعلاميين ؛ ويمرمط كرامة اللى جابونا وجابوهم فى الوحل والطين .
ضربة فى قلبك .. لما يستكردوا عقلك الطخين
؛ فتصدق كلام اللى بينهبنى وينهبك ؛ وتمسك السلاح تحمى الحرامى وتقتل الشريف .
ضربة فى قلبك .. وفى قلب كل واطى وسافل
ووضيع ؛ وسادي وخاين وسفيه ؛ ومعتوه وعِرَّه وعميل ؛ وخاضع ودلدول وذليل ؛ وطرطور
وراس كرمبة وعويل .
ضربة فى قلبك .. وفى قلب كل ملازم
ونقيب ؛ ورائد ومقدم وعقيد ؛ وعميد ولواء وفريق ؛ وفريق أول ومشير ...... ضربة فى
قلبك لو كان لك قلب .. ضربة فى قلبك وفى قلب كل حقير.....
--------------
مقطع ثانى :
تحكى لى أمى دائماً حكاية البنت التى
كانت تسكن فى المنزل المجاور لهم ؛ والتى أحبت شاباً صايع ضايع فى المنزل المقابل
؛ وتحدت كل أهلها الذين رفضوا هذا الزواج ؛ وتزوجته دون موافقتهم ؛ وأقامت معه فى
منزل أسرته المقابل لمنزل عائلتها والمقابل لمنزل عائلة أمى . ومرت الأيام وبدأت
أصوات الهبد والرزع والضرب والبهدلة تأتى من الشقة .. فقد كان الزوج البلطجى بيصبح
صاحبتنا بعلقة ويمسيها بعلقة ؛ ورغم شدة الضرب وقسوة الإهانة ؛ لم تكن الزوجة
المضروبة تبكى أو تصيح أو تستغيث ؛ وإنما كانت تجأر بعبارة واحدة لا ثانى لها ؛
ولم تتغير أبداً رغم شدة الضرب واستمراره صباحاً ومساءً .. كانت العبارة هى : اضرب
يا نقاوة عينى .. اضرب يا نقاوة عينى .. اضرب يا نقاوة عينى ......
... ربما كانت تعتذر بذلك لأهلها ؛ أو
تعاقب نفسها ؛ ولكنها لم تستطع أبداً أن تمتلك الشجاعة ولا القدرة على أن تأخذ
قراراً بأن الاعتراف بالخطأ لا يعنى الصبر عليه ؛ وإنما يقتضى تغيير الطريق
والرفيق ؛ والبدء من جديد .. من جديد ....
---------------
مقطع ثالث :
سؤال برئ : لماذا لم يطلب المجلس
الاستشارى من مجلس الأمن ؛ أن يرسل قوات حفظ السلام للفصل بين مغاوير الجيش المصرى
وبين المتظاهرين والمعتصمين ؟!!!!!!
--------------
مقطع رابع :
الشعب المصرى فى مفترق طرق وعليه أن
يختار الطريق :
الطريق الأول : ضربة فى قلبك .
الطريق الثانى : اضرب يانقاوة عينى .
الطريق الثالث : مغلق بحواجز الشرطة
العسكرية وبلطجية الداخلية .
**********
دكتور / محمد محفوظ
dr.mmahfouz64@gmail.com
ليست هناك تعليقات:
إرسال تعليق